وين انت ياقضاي حاجات الاجواد

وين انت ياقضاي حاجات الاجواد
ياخي لنا حاجه ولا احدٍ قضاها




ابطى الحيا بوجيهنا بس ما فاد
كثرت رسايلنا ولا احدٍ قراها




قل للكبار العايشه عيشة اسياد
ان الصغار موصله منتهاها




قل ياعرب لحقت على الشرب والزاد
والناس تمسي ما تحصل عشاها




ياهل الترف والمال والجاه وش عاد
ياهل القصور اللي يذري ذراها




يا عالم ابطيتوا تنمون الاعداد
ما هكذا وصى هل المال طاها




حسوا بنا ياللي نعد انكم سناد
لا تتركون احوالنا في شقاها




جادت شيمنا لكن الحظ ما جاد
ما اعظم من انفسنا وما اصغرمناها




حسوا عشان نحس في طعم الاعياد
حسوا عشان الشمس نعشق ضياها




حسوا عشان نعلم الحب الاولاد
حسوا عشان الارض ينبت ثراها




حسوا عشان نعيش ونغيض حساد
حسوا عشان المزنه تصب ماها




حسوا عشان الخير والطيب يزداد
حسوا عشان الأم ينمو ضناها




حسوا عشان يغيب صوت ابن شداد
حسوا عشان تضم ليلى فتاها




حسوا عشان الناس ما تصبح اضداد
حسوا عشان النار نسلم لظاها




خلو لنا معكم على الجم ميراد
حتى النفوس يصد منها غثاها




لو انكم لجروحنا صرتوا ضماد
كل اغنياها تلتفت لفقراها




العز للإنسان لا عاش ببلاد
الله على الراحه من اللي لقاها




مدري متى بنموت بس التعب زاد
قلنا ابشروا بالحب لحظة دواها




لو ما خذينا لقمة العيش بجهاد
جانا من ادنى ربعنا من خذاها




هذا زمن بيع الكلاوي والاكباد
والله علم باكر وش اللي وراها




بيض الجباه وسمر الأيدي والاجساد
عيا العرق والكد يقطع ضماها




مع كل مطلع شمس ياكثر الانكاد
بقعا على الأحرار تدرج رحاها




ندفع فواتير انتهاكات الأوغاد
وندفدف اعمارٍ قصير مداها




لو الحياة امرار والعمر ينعاد
قلنا بدل هالمره اللي قفاها




ناس على اللقمة ذبحها التوجاد
وناسٍ من التخمة تسوم اخوياها




حتى النفس صرنا نتنفس بالاقصاد
تكبر ديرنا ويتلوث هواها




يالله بكم متر مربع للأحفاد
لو ما ننول إلا القبر من ثراها




العيشه بخيمه من خيام الأجداد
أكرم لأجاويد تكرم لحاها




قولوا لمن قفى بلحظات الاسعاد
والرعب بثه في النفوس وملاها




يا فقر لو قمنا جماعات وأفراد
تبشر ملايين الضعوف بهناها




كم كانت الأقوام في شرك وإلحاد
لين أرسل الله بالصحيح انبياها




والشعر لو ما جاله آثار و ابعاد
عيبٍ على راعيه فيه يتباها

لاهنت على هذا الاختيار

انتقاء رااااااااااااائع ومميز
كل الشكر والتقدير لك*

::

/

لاهنت ع الاختيار والذووق الفريد..
شكري وتقديري لك ..

اختيا ر رائع الله يعطيك العافيه

انا غير ,,
دائما غير ,,
يعطيك العافيه على اختيارك الرائع ..
تقبل مروري _^

بارك الله فيك اختيار رااائع