غربة إهبالي

على دروب الهوى ضايق لحالي = وبين ضلعان الظلام ناري مولعها =
أنور على نفسي من غربة إهبالي = والوحده اللي سقتني من مدامعها =
تورد ضيقه بالحشى جمرها صالي = وعروق البسمه سيف الهم قطعها =
لكن طموحي يمد حباله ويرخالي = لجل هنوفن إحترت كيف أجمعها =
مدري الحلا أو الترف بعثر أحوالي = تهت بديارها وألقاني بين أصابعها =
تقول أخاف عشقن ماله دوى لي = وأخاف من جور الليالي ووجعها =
وأخاف ظلم الهوى لامن حكالي = الليل عن قلوبن تحترق من ولعها =
عساه ماهو بفالك ولاهو بفالي = ولو ضاقت بك دروبك ربي يوسعها =
قلت أنا هاوي هالمسى دامك هلالي = أسج وأتيه بعيونك وش عاد دلعها =
والبلا من شفاك اللي خذت بالي = وحروفك اللي تلعثم بقلبي بلعها =
زانت علوم الهوى ونسنس شمالي = وترمدت أحزاني وجفت مواجعها =
عساي أول من عناك ماني التالي = خفافيش حزني نور خدك خدعها =
وحرقها لين أستوت رماد غربالي = وهجعت نفسي دام البدر يراضعها =
غدت بعيوني هنا وبالقلب لي والي = هي وردة غرام وبالجوف زارعها =
أنا هويت شمس العنا دامها ظلالي = يعني لو تسوقني للموت أطاوعها =