نبذه عن حياة الشاعر حباب السندي رحمه الله

	نبذه عن حياة الشاعر حباب السندي رحمه الله هو حباب بن سندي بن سبيل الرشيدي عضو في ديوانيه شعراء النبط الكويتيه شارك في كثير من المحافل الرسميه وغير الرسميه وله مساجلات مع بعض الشعراء صدر له اربع ديواوين من الشعر (1)- ديوان الاحفاد لذكر الاجداد . (2)- ديوان بن عبس بين اليوم والامس. (3)- ديوان عيد الخياري الذي قام بجمعه واعداده على نفقته الخاصه. (4)- ديوان حباب للشعر والحكم والاداب. قضى حياته رحمه الله رحمة واسعه بأعمال البر والخير طيب الخلق محمود السمعه والسيره محبوب عند الجميع له منزله عند كثير من الناس رحب القلب بشوش الوجه يقوم بتحمل حل المشاكل وأصلاح ذات البين بين الناس . يعين بجاهه من لا جاه له ، يتجاوز عن هفوات الاقرباء والاصدقاء يساعد العاجز بحل مشاكله ، وجميع أعماله في الخير لاحدود لها ومن اعماله الطيبه في فعل الخير بناء بعض المساجد في بعض الدول العربيه الشقيقه. جزاه الله عنا خير الجزاء وأدخله فسيح جناته أنه قريب مجيب الدعاء ، وقد رثاه كثير من الشعراء ذاكرين أفعاله بالخير وأعماله الطيبه. سنورد ما حصلنا عليه. وهذه مرثيه للشاعر / عايد السندي في رثاء شقيقه المرحوم حباب السندي الذي وافته المنيه في المملكه العربيه السعوديه في ضواحى منطقه حايل على اثر حادث مؤلم تغمد الله الفقيد بواسع رحمته آمين . مرحوم ياللي بأرض حايل فقدناه ** عز الله انه ضاع منا فقيده ان قيل وان ما قيل والا ريثناه ** أنا أشهد انه راح منا وليده سهم القدر باقصى الغزاله تمثناه ** في حادث ٍ جعل الولي ما يعيده أكمل مباني مسجد ٍ زان مبناه ** يرجي ثواب الله نظيف العقيده ومشى صلاة الصبح عجل ٍ بممشاه ** قضى المهمه وأكمل الدرب سيده أسرع شوي وصار ما كان نخشاه ** ومن قوة الحادث تناثر حديده مات العضيد اللي بفعله عرفناه ** رجل المواقف بالامور الشديده بكا على قبره رجال ٍ مسماه ** من غير صدقانه وغير البديده أخوي لو يفدى بروحي فديناه ** لكن قضى رب الورى ما يريده مرحوم ياللي دوم يضحك محياه ** سمح ٍ جنابه والمواقف حميده فيه المروه والتواضع لمن جاه ** يعطيه ماجوبه ولو هو ضديده شهم وفي وافي حميده سجاياه ** يم العلا هومات نفسه بعيده كمل دروب المجد والحمدلله ** واليا انقضت كل البشر ما تفيده وراح الفقيده واكثر الناس تنعاه ** عبر الاثير وما كتب بالجريده يالله ياللي طيبات ٍ عطاياه ** يامن بديت الخلق تقدر تعيده يطلبك عبد ٍ مخلص ٍ وانت رجواه ** ياحي ياراعي العطايا الحميده ترسل على قبره عبير ٍ تغشلاه ** غيث ٍ من الرحمه يفيض ويزيده وأرسل على قبره سحاب ٍ نثر ماه ** يروي ثرى قبر ٍ سكنه الفقيده الله عنا باحسن الخير يجزاه ** وجنات عدن(ن) جعلها من رصيده طالبك ربي جنة الخلد مأواه ** آمين صلى الله على اشرف عبيده وهذه مرثيه للشاعر / موسى بن عمران الرشيدي يرثى فيها حباب السندى مرحوم ياللي مات غرب الغزاله ** شرق ٍ من الشعبه شمال أم سلاه يوم الاحد سابع رجب من هلاله ** حل القضا والقدر والاجل وافاه والحمد للمولى على كل حاله ** نصبر على ما صار والامر لله مرحوم يارجل ٍ اليا جا مجاله ** قولة نعم تنقال بحضور طرياه رجل ٍ على الشدات ما ضاق باله ** اليا قام بالموضوع بأمر الله انهاه مواقفه فيها الوفا والجماله ** حباب عزن في مقامه وممشاه حباب لا ركب الرشا بالمحاله ** كم من ضعيف ٍ ساعة الضيق ناداه متجاذبه بالطيب عمه وخاله ** عزيز جاه ومن اهل العز مجناه تارد على عذب الموارد أحباله ** يشرب من الجمه ولا يقصر أرشاه وان انعقد عقد ٍ صعيب انحلاله ** حله براي ٍ راعي الفكر يرضاه وفي مجلسه يلقى الشرف والشكاله ** وسوالف ٍ عن كل عيب ٍ منقاه ولو اذكر اللي ماضي ٍ من افعاله ** كان القلم يكتب ولا يحصي ادناه لو كان عنا مقفيات ٍ ارحاله ** ارثاه في زين المثايل ولا انساه الله اكبر يالزمان وحواله ** امسى الضحى وياه واليوم نرثاه مرحوم ياللي ما يشح بحلاله ** عند اللوازم يرخص المال والجاه وان جاه رجل ٍ من بعيد ٍ عناله ** يضحك حجاج اللي من البعد ينصاه تعطي يمينه ما درت له شماله ** وما قدمت يمناه من خير يلقاه ندعي له الرحمن جل جلاله ** يغفر ذنوبه ويتجاوز خطاياه عسى جنان الخلد فيه النزاله ** مع الكرام بجنه الخلد مأواه بدار النعيم اللي ظليل ٍ ظلاله ** الله يجمع بين الاحباب وياه راح الفقيده والبقا في اعياله وأخوانه ** اللي بالمهمات شرواه اليا غاب نجم ٍ بان الاخر بداله ** والحر ينجب مثل وصفه وحلياه ما هل همال ٍ صدوق ٍ خياله ** صلوا على اللي بالشريعه تبعناه وهذه قصيده رثاء للشاعر / فديغم بن خنيفر بن سبيل في رثاء حباب السندى رحمه الله البارحه عضيت روس البهومي ** جض ٍ صناديق الحشا جمل وفراد قعدت انا لين دلبحن النجومى ** والعين كن الها عن النوم ذواد وأصبحت من شوف الحبيب محرومي ** حالن من دونه طويلات الالحاد اليا جا القضا ما ينفعن العلومي ** ما تنطح رادات ربي اليا راد أجبر عزانا يا منشي الغيومي ** انت الكريم اللي لك الخلق سجاد تعوضنا باللي يسد اللزومي ** عوق الخصيم اليا حصل غيض وعناد شوره براسه ما يطيع الرخومي ** له عادة ٍ يلطم خصيمه اليا زاد محنك ٍ مثل الحصان العزومي ** كريم سبلا وان هبا كل حساد حباب غيث ٍ للضعيف رحومي ** يا مكثر الترحيب يا مقلط الزاد يمناه دايم للطراريش تومي ** متبين(ن) طيبه على روس الاشهاد معصوم عن درب الردى ومحشومي ** مجناه من بيت المروه والاجواد يا عل بيته ما يصير مهدومي ** ويصير مثله من شغاميم الاولاد يالله ياللي ماش غيرك يدومي ** تحط له في جنة الخلد مقعاد وهذه قصيده رثاء في حباب السندي للشاعر / شامان عمر الرشيدي يا ورق أباجاوب نياحك بنوحي ** لو ما يفيد النوح بفراق غالي مما دها يا نايح الورق روحي ** أصبحت معزول ٍ جو ٍ الحالي يلوحني حر التفاريق لوحي ** والكبد يصلاها من الحزن صالي على الذي لو صحت ماهو بيوحي ** فقده سطا بالحال واعزتالي صديقي اللي حاسبه ضمن روحي ** حباب عنا بعدته الليالي ماني على مثله بنوحي شحوحي ** لاواه من فرقا كريم السبالي يالعين فوحي بأزرق الدمع فوحي ** خليه فوق الوجنتين متتالي لو أن دمعك ما يداوي جروحي ** الامر للي والي ٍ كل والي ما ينطح سيف المنايا نطوحي ** لا حل بأمر ٍ من عزيز الجلالي مرحوم ياللي للمعالي طموحي ** ذرب اليمين اللي طلع للمعالي ماهو بحزات الشدايد لحوحي ** يعجبك كأنه صك جال ٍ لجالي عن ربعته صعب المشاكل يزوحي ** براي ٍ يحل معقدات الحبالي أقفا وحنا مع طريقه نروحي ** درب ٍ معه كلن يشد الرحالي يالله يامجري السفينه بنوحي ** تحطله في ظل عرشك ظلالي يامن لراع الحوت تسمع وتوحي ** يا خالق ٍ خلق ٍ وراه الزوالي ياواحد ٍ لخطا عبيدك تبوحي ** تغفر ذنوبه دقها وجلالي وهذه قصيدة رثاء للشاعر / ناصر خنيفر الرشيدي في رثاء حباب السندي علم ٍ لفا يا عل ما الله يعيده ** علم ٍ تفاجوا فيه من يسمعونه قلت الخبر قالوا توفى وليده ** حباب عنكم مقفيات ٍ ضعونه وشبة بصدري مثل نار ٍ وقيده ** نار ٍ حطبها بالغضا يشعلونه قلت أنتهت والله فعل ما يريده ** أمانته والله خبير بشونه جاه الذي لو طال عمره يصيده ** الموت ديان ٍ يطارد أديونه ولا فيه مخلوق ٍ حياته مديده ** مابه مخلد بالبشر يذكرونه مهما ضحكنا بالليال السعيده ** الادمي ملزوم سلمى تخونه أما تجي بأول شبابه نكيده ** والا بتال العمر شاف المهونه وموتت حباب أكيد والله فقيده ** عند القبيله والذي يعرفونه ملزوم يفقد من صفاته حميده ** على الخوي والجار نفسه حنونه وعز ٍ للربعه بالليال الشديده ** واليا تخالف رايهم ينحرونه له راي يحسب ضمن الاريا السديده ** طلق ٍ حجاجه بالقسا والمرونه من جاه يبغي الشور علمه يفيده ** ومن جاه يبغي العون يبشر بعونه واللي يعرفونه من أيا بديده ** اليا حل ذكره كلهم يشكرونه ويا الله يا محيي عظام ٍ هميده ** يا من عبادك رحمتك يرتجونه تمحا ذنوبه والحساني تزيده ** وفي رحمتك وسط اللحد ترحمونه بالخير والحسنات زود رصيده ** واعلى الجنان العاليه تدخلونه وعسى العوض بأحمد وهندي عضيده ** عسى سلوم العود ما يخلفونه والموت قبله شال ناس ٍ عديده ** واللي بعدهم دربهم يضربونه سنه من الله سنها في عبيده ** وله التصرف في عباده وكونه وهذه قصيده رثاء للشاعر / عيد نفاع الرشيدي في رثاء حباب السندي مات أبو هندي والفعل حي ما مات ** دب الليالي باقيات ٍ أفعاله غايب رحل وليا نظرت الكتابات ** ما غاب مجده حافظه عن زواله مرحوم ياللي له مواقف مهمات ** تاج وفخر بالطيب تارد حباله مرحوم ياراع السخا والمروات ** مضت حياته بالكرم والجماله لاهو بزراي ٍ ولا هو بشمات ** من شبته ما عد عنه الفساله ما صك بابه دون وجه القرابات ** والضيف والعاني شريك بحلاله يبكونه اقصى الناس وأدنى الرويضات ** موتى العرب واجد وموته الحاله مرحوم يا شيخ ٍ يحل الشكلات ** قوام بالواجب ونطاح قاله فكاك نشبات ٍ وفعال خيرات ** يمد باليمنى وتعطي شماله ينعاه من قلت عليه الحيالات ** بالسجن ممنوع ٍ عليه الكفاله عوين من حده مطاليب وأديات ** اليا أنثنى عاجز تحيزم وشاله حباب شيال الحمول الثقيلات ** مال الضعيف ان قل بيديه ماله تغمده ربي برحمه وجنات ** وأكرم نزوله واستظله ظلاله مالوم قلبي لو يجر التنهات ** ويفز من حلو الكرى لا طراله هاذي هي الدنيا مصايب ولوعات ** مات أبو هندي والبقا في عياله وهذه قصيده رثاء للشاعر / رشيد بن عواد الرشيدي في رثاء حباب السندي حباب راح وكلبونا فقدناه ** راع المعرفه والوفا والجماله ما يرجعه كثر البكا لو بكيناه ** يومه وقف وقفا وقفت رحاله اليا صارت الدعوه وكبرت نصيناه ** وأستقبل الدعوه بهدوء وسهاله يحلها بالراي والفكر والجاه ** وأن كانها بالمال يسوق ماله اليا لبس بشت ٍ فوق الامتان تزهاه ** والفرد والغتره مزين عقاله ياقف لها وقفت جمل مكره عداه ** ما يلحقه منها زمل بأي حاله يفوز أبو هندي على من تحداه ** بالحق ماهو في طريق البطاله مثل النداوي والنداوي حلاياه ** حباب شيال الحمول الثقاله اشهد شهادة حق ما هي مضاهاه ** ان أبو هندي ما نحصل بداله أقولها بجهار ماهي مناجاه ** واللي زعل يشرب من الماء حثاله راع المزايا الطيبه مانسيناه ** يذكر علينا كل ما جا مجاله عساه بالجنه محله ومثواه ** وعسى العوض عقبه بحضرة عياله عساه يطلع واحد ٍ مثل شرواه ** والا على حده بكل المقاله من لابة ٍ مثل الذهبه مصفاه ** وأساسهم مثل الذهب عن رياله ربعه حمول الخيل يوم الملاقاه ** ولاخير باللي ما لقوله دلاله فكاكة الخلفات يوم المثاراه ** اليا طار ستر أمشطات البلاله وهذه قصيده للشاعر موسى ابن عمران الرشيدي عندما مر في رجم المرحوم حباب السندي الذي بناه في ايام شبابه حيث جدد بناه قبل وفاته رحمه الله سلام يارجم ٍ على راس مرقاب ** يا اعز مرقاب ٍ واعز الرجومي اعز للمرقاب من عز الاصحاب ** وقلبي على مرقاه دايم يهومي المرقب اللي للمحبين جذاب ** والرجم كانه يم الاصحاب يومي أرقبت به مشتاق من زود الاعجاب ** أبا الوناسه مير زادت اهمومي والقلب من مما شافت العين منصاب ** وقامت طيور البين فوقي تحومي أشوف بالمرقاب رجم ٍ له أسباب ** عليه من جرد السنين الرسومي بناه بن سندي بعصره وهو شاب ** أيام عصره فات ما هو اليومي بناه فيه يمناه يوم الهوى هاب ** هبت له الغربي تسوق الغيومي يوم الزمان اللي ضحوك ٍ بالانياب ** يضحك ضحكات الدهر ما تدومي واليوم غاب وحال من دونه تراب ** ومن مرقب المرقاب صرت محرومي بقيت يارجمه على اسمه وهو غاب ** عساه بجوار الغفور الرحومي قلته وعيني تذرف الدمع سكاب ** ومن ذاق فرقا صاحبه ما يلومي يا عل عين ٍ ما بكت فرقا الاحباب ** يقصر نظرها ما تشوف الحزومي يارجم ياللي بين وديان وهضاب ** هلت عليك مبكرات الوسومي وأخضر ترابك أزهرت حولك أعشاب ** ونزل بقربك طيبين السلومي هذا وأنا من مرقبك خاطري طاب ** حولت من مرقاك مالي لزومي رحم الله أبو هندي رحمة واسعه وأدخله فسيح جناته وغفر الله جميع ذنوبه وتجاوز عن هفواته آمين أرجو من الاخوه الاعضاء والزوار أن يدعو له بالمغفره والرحمه من الله . وســلامــة الجـــمــيــع ،،، عايد السندي

الله يرحم حباب السندي ويتغمد بروحه الجنه

وصح لسان الشعار على المرثيات الصادقه من قلب !!


ولاهنت اخوي عايد على هذا اللنقل الرائع ! تقبل تحياتي وتقدير اخوك ابو ناصر

رحمه الله رحمة واسعه وأدخله فسيح جناته وغفر اللهجميع ذنوبه وتجاوز عن هفواته

رحم الله ابو هندي رحمةً واسعه واسكنه فسيح جناته انه سميع مجيب الدعاء

ولاهنت يابو صالح على هذه النبده المختصره للراحل


تقبل تحياتي وتقديري

الله يرحم الاديب الشاعر حباب السندي ويغفر له ويتقبله في نزله الكرام

وجعل جنة الخلد مثواه يارب العالمين اللهم امين لاهنت يابو صالح

على هذي النبذة التعريفية وحباب السندي عرف عنه الوفاء والاخلاص والعونة

والفزعة رحمك الله يابو هندي رحمة واسعه

الله يرحمه برحمة واسعة من عنده ويدخله فسيح جناته

ربي يعطيك الف عافيه على الموضوع والقصه الرائعه والمميزه

تسلم يدينك وتقبل مروري

تحياتي...

اللهم ارحم ابو هندي رحمة واسعه واسكنه فسيح جناتك ,,,,,,,,,,,,,, وجعل اعماله الخيريم في ميزان حسناته,,,,,,,,,,,,,,,ومشكور عمي ابوصالح على هذه النبذه المختصره من حياة ابوهندي تقبل تحياتي ,,ابو نور