ماش جوّي صار ضيقه وغبره
سقتها لو عجعجة صوبي أمور
ولو لحقني من غثاها ثرثره
مالها عندي سوى حقر محقور
ويش جابك يازمان الهستره
كيف حالك يازمانٍ بك عثور
منك رجلٍ زاد ضيقه وقهره
مير دمعه غصب معلنها حدور
عّز حاله من قطع رزقه مره
لعنبوها كيف يشره من يشور
معرفتهن من وراها مرمره
وكيدهن من بينهن نارٍ تثور
تحرق الرجل وبها زود نعره
راح وقتٍ يارجل ماله حضور
من يطاوع واحدٍ يبس ثمره
أو يشاور مايلاتٍ للفجور
أشهدنك يازمن جبت خبره
مايعاتب أو يعذرب دام جور
عوق وقت وفيه كذبٍ أشكره
ليت هالدنيا تحن وله تدور
للأسف تحسد على ظّل شجره
عفت كل غصونها ويّ يالجذور
كل قاطع رزق يالله تحشره
يوم يقبر معه ظلمه ومحشور
دعوةٍ يارّب ذنبي تغفره
راجيٍ بك ياكريم وياغفور
كّل ذنبٍ ينمحي دون قبره
خاضعٍ لك ياعليم وبك صبور