______________

يا بشر تكفون حلّو عن سمايه
ما يصيب الهرج لو الهرج صوبي
كم سكت لكم بما فيه الكفايه
اشتموني لو زعلتوا واشمتوا بي
عيبوني واتركوني في عمايه
واتركوا لي واحد يرضى عيوبي
اتركوا لي واحد يمسح شقايه
كل ما حط الزمن دوبه و دوبي
ذاك والله لو ذكرت انه ورايه
اشعر إن الكون كله وسط ثوبي
يكفي انه لو يسولف للمرايه
كن صوته يهمس ل صورته.. ذوبي
كيف أنا ما أذوب ما دامه معايه
اسمعه و أسهر معه لآخر دروبي
كل ما قال السهر درب الغوايه
قلت كله من عيونك هبّلوا بي
وكل ما قال الخطا ماهو خطايه
قلت له قل للعيون السود توبي
ضيعتني واسأل الله الهدايه
وين أجيب العقل.. أجيبه من جيوبي
من يعرفك ما يدل العقل رايه
يا شروق العمر.. مدري يا غروبي
أذكر انك كنت لي مثل الهوايه
لو تروح ولو تجي يبقى شحوبي
بس مدري كيف صرت اليوم غايه
وصرت أجي و أروح مدري عن دروبي
يا بعد عمر الكتابة و القرايه
يا الشمالي يابو الملح الجنوبي
لا قريت اللي كتبته يا رجايه
رح وبلغ ربعي اللي جننوا بي
قلهم يمكن يخلون الوشايه
و إن تمادوا خلهم مهما حكوا بي
أنت خلك بس في الدنيا عزايه
لا تفكر في العواذل وأنت صوبي
ادري إن كل درب وله نهايه
بس أنا باقي معك لآخر دروبي
_____________

[ /~