منتديات سلايل عبس | بني رشيد - لاتقرب العزاب سوق المغاتير

منتديات سلايل عبس | بني رشيد (http://www.slayl-abs.com/vb/index.php)

- منتدى الشعر النبطي (http://www.slayl-abs.com/vb/forumdisplay.php?f=15)

- - لاتقرب العزاب سوق المغاتير (http://www.slayl-abs.com/vb/showthread.php?t=28736)

لاتقرب العزاب سوق المغاتير

أحبائي أسعد الله صباحكم , كان بودي أن أشارككم في قصيدة ( غيمة الميعاد ) ولكن لظروف طارئة وسريعة كتبت هذه القصيدة والتي فرغت من كتابتها الساعة مواكبة للحدث بعد أن رأيت مقطع فيديو يندى له الجبين , وسوف إن شاءالله يعمل لها تصميم خاص ,

هذي نتيجة طال عمرك قرارك=ان كان هذا الشي يرضيك يامير
قرار لايخدم ولا هو مبارك=عطيتهم فرصه وجونا طوابير
السوق صار اليوم ساحة معارك=يومين سوت فيه فوضه وتغيير
جتك الجحلط في كدشها تبارك=اللي على الفرصه تطق المشاوير
لبست من الضيق وراحت توارك=على بنات الناس مثل المناشير
وراحت رجال الامن معهم تعارك=وقايع سجل عليها تقارير
حتى الشرط بالسوق صارت تشارك=باسباب شله فاسده مابها خير
عقول ماتدرك وتاطا المدارك=يعرض عليها المسك وتدور الكير
كم واحد من قبضة الأمن فارك=مطلوب في تفحيط ومعاكسة سير
وكم فيهم اللي للصلوات تارك=ضيق صدور اهله وضاقوا به الغير
اللي مايسلم من اذاهم جدارك=مايعقلون الا بوسط العنابير
قدام لاياكل زهابك حمارك=افتل رباط العير وارتح من العير
ياميرنا صطام دايم شعارك=العقل والحكمه وحسن التدابير
لك هيبتك لك سطوتك لك وقارك=ولك عندنا حب ومعزه وتقدير
كم من حكيم تاه لين استشارك=من ظلمة الحيره لقى فيك تنوير
وكم حي من هم الحياه استجارك=واقبلت ووجيه الليالي مدابير
يابن الإمام الفيصليّ المبارك=اللي حكمها بالسيوف البواتير
اقطع فلول الشر والشر بارك=لاتقرب العزاب سوق المغاتير
يامير نجد اخاطبك باعتبارك=صاحب قرار تصيّر الأمر ويصير
مسلم وعن هيبة خواتي مشارك=والمعذره يامير عن كل تقصير