طاش السهم ياللي تقولون ما طاش=في مجتمع دينه علامة فلاحه
على انتقاد اهل اللحى صابه اخراش=واستخدم الاعلام للحرب ساحة
واليا انتقدهم شيخ قام الف خفاش=سوت لنا بعض الجرايد مناحه
نفهم سبب هجمة هل الكفر الاوباش=ونجهل دوافع هالعمل وانفتاحه
سؤال ما يحتاج تقويس وفلاش=من يقدر يجاوب عليه بصراحه
سنة محمد تنتقد بيننا كاش=في حجة إنه الدين يسر وسماحة
والدين ماهو عرضة لراي ونقاش =إلا من اللي فيه علم ورجاحه
باكر يجي كاتب ولاعب ونقاش=يجيز للناس الربا والنياحه
شعورنا بالغيظ طاغي وجياش=مما نرى ما عاد نشعر براحة
خذا بنقد الدين مسري وغباش=وعلى رجال الحسبة اعلن كفاحه
يوضع خطاهم بين مجهر ومنقاش=ويعرض على الشاشه بسخف وبجاحه
ما يكرهم الهيئة سوى واحد غاش=تخيفه الهيئة وتكبح جماحه
يكرهم مشعوذ ومفسد وحشاش =ويحبهم هالمجتمع من صلاحه
حرس الفضيلة بس ما يحمل كلاش=والمؤمن الحق النصيحه سلاحه
ياسيدي سلمان الضاحك الباش=يا من تهابه في غضبه ومزاحه
يا من تضيق بخصمه الارض لا هاش=رمح الرياض ان كان عدو رماحه
سلمان هو طب القلوب اللي غشاش =لا كابرت والغيظ هبت رياحه
لو انه اعزل وانت في يدك رشاش=تخاف منه وتستظل بجناحه
ياسيدي حنا على الفزغة عطاش=هذا الورم محتاج منك لجراحه
اليا متى نكتم غضبنا بها لجاش=والسخرية بالدين صارت مباحة
حنا حلمنا حيل لكن على ماش=الحلم زاد الخطب هذا فداحه
لو غلفوا هالحقد واخفوه بقماش=من يستره والله يريد افتضاحه
حرية المراة شعارات ببلاش=والا الهدف نشر العري والاباحة
اذا نسانا غادرن حضن الاعشاش=كل احتمالات التفكك متاحه
ياسيدي المجتمع كله انداش=دينه وعاداته غدت مستباحه
هذا البلد تاريخه ابيض من الشاش=ارض الرسول وعمر وابن رواحه
معقل اهل السنة من الطاش للطاش=ماهي بلاد الرهبنة والسياحة
شعب بحكم الله تحت ظلكم عاش=جمعتوا اطرافه وطابت جراحه
لحافة التوحيد والسنة فراش=الدين تاجه والعوايد وشاحه
والمجتمع لا صارت اسواره هشاش=يسهل حتى على الجراد اكتساحه
لا يعتذر لو يعتذر طاش ما طاش=بعض الخطأ عذره يزيده قباحه

هذا البلد تاريخه ابيض من الشاش=ارض الرسول وعمر وابن رواحه