مجموعة قصايد مساعد الرشيدي

[فهد بركة الرشيدي]

ينجرح قلب لكن ترتفع هامة...
والله إني لا أموت ولا إنحنى راسي...
لو رماني زماني وسط دوامه...
العواصف شديدة والجبل راسي...
أنقل الحزن وأمشي منتصب قامة...
قاسي الوقت لكني بعد قاسي...
وأسمع الحلم يصرخ لحظة إعدامه...
رابط الجاش ماهز الخبر باسي...
عزتي غالية والناس سوامة...
قلت ما أطيع حتى تقطع أنفاسي...
زانت أيام عمري شانت أيامه...
مارجيت العزا من رحمة الناسي...
من عجز لايدوس الهم بأقدامه...
لازم إنه مع الأيام ينداسي...
يندمل جرح قلب ماتت أحلامه...
بس ما أظن يبرا جرح الإحساسي...
يوم صارت مابين القلب والهامة...
ويش أبي بالحياة إليا إنحنى راسي

[فهد بركة الرشيدي]

ولع رماد الشوق يا معذبي نار..
من كان يحلم بـ إشتعال الرمادي..
ما كنت أحسب إنه يكون اللقا حار..
لين إلتقينا و إشبكتنا الأيادي..
و قامت لنا الذكري تغني على الطار..
تنساب بـ أسماعي نغم حب هادي..
حسيت شي لفني مثل الإعصار..
و استيقظت نشوة غلاك بـ فؤادي..
أخذت لي سجة وأنا شبه منهار..
بين الخيال و بين علم وكادي..
و فزيت يوم إني تنبهت وش صار..
مثل الذي توه صحا من رقادي..
تغير الموقف بلا سابق إنذار..
و غير المشاعر جت مشاعر جدادي..
رديت لك عقب التجافي و الإنكار..
و طويت صفحات الزعل و العنادي..
و تبددت ذيك المبادي و الأفكار..
أية جنون أفكار و أية مبادي..
تراي أنا مليتها لعبة النار..
ما أحد لعبها قبلنا و إستفادي..
من رد لـ الجنة عقب صالي النار..
حتى السموم يصير عنده برادي

[فهد بركة الرشيدي]

يا إبن الحلال أنت وش تبغى بـ هالدمعة..
بتموت ما شفت دمعة ذل من عيني..
ماني حبيبك إذا ضحيت بـ السمعة..
لا ذلني حب ويش اللي تبي فيني؟..
لا تكسر الود يجرح راحتي جمعه..
يكفيك جرح الحشا لا تجرح يديني..
لا تزهم الليل كل اللي بقى شمعة..
هي كل شي تبقى بينك و بيني..
وهج المكابر تراه بـ يحرقك لمعه..
باكر ترى أقول لك ما عاد يمديني..
أبعدتني و القلوب القشر مجتمعه..
دايم و أنا القاك, دايم و أنت مغديني..
أدور أنا و أنت مثل السبت و الجمعة..
يا قربنا و الصحيح إنا بعيديني

[فهد بركة الرشيدي]

ليلك نثر عطره على شاطي النيل..
وأنا ضواني ليل نجد و سريته..
يا مطول الغيبات ياما أطول الليل..
توي دريت إنه سواد و جفيته..
أثر النجوم أكثر من الجدي و سهيل..
نجم كتب همي و نجم محيته..
يا صاحبي عطشان عطشان لك حيل..
مظمي و همال السهر ما قويته..
رد السلام لـ مترفات المناديل..
كحل العيون و دمعك اللي نسيته..
الدرب ميت و الخطاوي مقاتيل..
وإن لاح طيفك مت فيه و حييته..
الله على الضحكة نهار المواصيل..
هاك النهار اللي بـ عمري فديته..
قبل أتقهوى من كسالا مظاليل..
قبل السلام و قبل جاني و جيته..
ضم الحشا و إكسر جمود التفاصيل..
ما عندي أغلى من خفوق كويته..
لـ مصافحك كف و قصيد و هلاهيل..
إما زبنك القلب ولا خذيته..
لو يغري القمرا ذبول القناديل..
بعت النهار لـ جيتك و إشتريته..
يوم إنتثر عطرك على شاطي النيل..
أنا ضواني ليل نجد وسريته..

[فهد بركة الرشيدي]

مراهيش نوك ماتبل الورق يا هن...
لها اليوم تاسع يوم تبرق ولا سالت...
يقولون لاضاقت عليك الوسيعة غن...
وأنا أقول شفت مقرد الخلق وش قالت...
أنا البارحة من غابت إلين أذن...
تحلوى عيوني للكرى مير ما إحتالت...
يثوع النعاس من أرمد الجفن يوم تعن...
سراميد غيظ بالحشا حبلها فالت...
ماغير أتدرق بأسمر الليل لا لجن...
هجوس تخطرت هيبة الجرح وإختالت...
هجوس ليا قامت تكرب وقمت أون...
تصرم معاليق الحنايا ليا إنهالت...
ذلول الهجاد اللي نبت في جماها سن...
من العام تثعي في ضلوعي ولا زالت...
حلال الذهاب إلى استشاطت لبسها جن...
عساي أتجود في نحرها ليا مالت...
وأنا يوم أمس بطانها ماعليه من...
يدين الهوان إن حطت اللوم وإن شالت...
ابا أزم نفسي عن طمان هواه مصن...
وأعدي لجفني وأرقب العين وش خالت...
عليها الملام ولا عليها السلام أبدن...
يدين تبي قصرة يديني ولا طالت...
بعد مانفضت غبار صدري ولد ياهن...
بعد ماروت روحي من الغيض وإكتالت...
يقولون لاضاقت عليك الوسيعة غن...
وأنا أقول شفت مقرد الخلق وش قالت...

[فهد بركة الرشيدي]

من هجوس تغني الذوق عن بعض الهجوس
يعلم الله كنها اللول يوم نصبها
كنها سراية البرق لي قامت تهوس
من يقول الله عليها نقول أبشر بها
القصايد ما نساوم عليها بالفلوس
تفتخر فينا القصايد قبل نفخر بها
من خلقنا الله وحنا عزيزين النفوس
ما نوطي شمخ الروس غير لربها
ماردينا والليالي لها وجه عبوس
خل يوم إن الليالي سميح دربها
لي جهزنا بالمثايل ندوس الراي دوس
والدسايس بارد العين ما يجهر بها
ما نشدنا عن دنوع على الجرة يحوس
يحسب إنه صار حاجة وهو من جنبها
قدرنا عند النشامى مجرب ومحسوس
الرجال اللي على الدين ما نبخل بها
التجارب علمتنا وصمينا الدروس
نعرف النفس المريضة ونعرف طبها
ينطفي سم الحيايا وهو تحت الضروس
يا الله إنك تختصرها على من شبها
البنآدم لاتعافى على كفه يبوس
وش يبي بأعراض الأجواد يوم يسبها
لايحسب إن المراجل تجي درباي روس
ينتبه من جمرة النار لا يلعب بها

[فهد بركة الرشيدي]

على كثر الكلام وكثر ماقبل الكلام جروح..
سكت وما لقيت الكلمتين اللي على بالي..
أخاف إن قلتها وإن قلتها وإن قلتها بوضوح..
توسدني ملامات الرفيق وشرهة الغالي..
كذوبة يا الهجوس اللي على الخاطر تجي وتروح..
بغيت أزبن ذراها واستريح وما تهيا لي..
ورحت أتلي شتاتي وآترجا صوتي المبحوح..
تموج بي الدروب ومسند كفي على ظلالي..
عسى ما إنتي رجايا يابروق في سماي تلوح..
يشرهبني رعدها والظما بالصدر همالي..
نقلت جروح ما أعرفها بقلب مرهف مجروح..
تنطحت البياض و سود الله وجه عذالي..
ولو طالت بي الحروة وبانت للملام شبوح..
نهض شوفي جنحانه واستبان المرقب العالي..
ولو خان الشفق مرة ومرة طيره المذبوح..
بقا وكره على جباه النجوم المرقبة خالي..
يسامحني رفيق كل ما أخطى قلت له مسموح..
على كبر الهقاوي من رفيقي مرخي حبالي..
ماهو بـ ذنب الكفوف اللي شذاها بالجميل يفوح..
إلى من صافحت بعض الردى في بعض الأحوالي..
ماهو بـ ذنب الوفا والنية البيضا وطيب الروح..
وأنا ثوب الجمالة ما لبسته جرد وسمالي..
على كثر الكلام وكثر غيظي مانويت أبوح..
عساها ماتعود الكلمتين اللي على بالي..

[فهد بركة الرشيدي]

كلك تعالي غلا ولا إرجعي كلك...
بعض الغلا منك مايستاهل الجية...
طالت وانا في رجا ليتك و ياعلك...
أوراق بالذاكرة وأوراق منسية...
مابل ثوبك مطر شوقي ولا بلك...
لو علتك من سحاب الروح وسمية...
ليه أمشي الدرب دامه ما يوصل لك...
تخاف رمضا الضياع أقدام رجليه...
يابنت تو الهوى ماصرت أنا خلك...
للحين مازالت الصورة رمادية...
ومازال بعض الغموض الشره يحتلك...
وشلون أنا أعشقك وأحبك على النية...
أشوفك هناك قدامي ولا أدلك...
صعب الكتابة ليا صار الورق مية...
إن كان شمسك تساومني على ظلك...
ماعاد أبي منك لا شمس ولا فية...
أما تعالي لقلب فز لك كلك...
ولا إتركيني ما ابي بالهوى جيه...

[فهد بركة الرشيدي]

كيف أطفي الريح بـ ثيابك و كيف أشعلك..
كيف أتنثر على جمرك و كيف أحتويك..
نقضت ليل الحرير و جيت ما إنت لـ هلك..
سميت بـ اللي فتني بك و قلت أبتديك..
هذا أول الدرب أو هذا الطريق أولك..
جيت أتوقا عذابات المدى و أهتديك..
شوقي مسافة و همساتك مدار و فلك..
إن ما ظميتك غلا يا علني ما أرتويك..
إيه أعرفك و أعرف إني من غلاك أجهلك..
مرات أضمك و أخاف إني مشبه عليك..
مرات أشوفك بنفس الوقت و أتخيلك..
و أنشد كفوفي عن آخر سالفة من يديك..
أعن لك لو تصب الموت و أتهيا لك..
و أجوع لك و أتمنى خنجرك و أشتهيك..
ما قلت لك عمر سيف العشق ما يقتلك..
ما تشوفني حي قدامك و أنا أموت فيك..
إشتقت لك قبل أجيك و جيت وإشتقت لك..
البارحة طول ليلي بين هذي و ذيك..
مليت جمر إنتظارك و استحيت اسألك..
و حسبتني ما بعد جيتك و فكرت أجيك..
أثرك بقلبي من البارح و أنا أستعجلك..
و أثري نسيتك من الفرحة و قمت أحتريك..

[فهد بركة الرشيدي]

لاعاد تنشد مابقى عندي علوم...
كل العلوم المبطيات تخبرها...
ماجيتك أشكي ميلة الوقت مزحوم...
نفسي ليا ضاق المدى ما أخسرها...
ياصاحبي كنت أمس كنت أمس محشوم...
واليوم هج بجيتك وإختصرها...
خلك بعيد أبعد من العام لليوم...
وأدنى من أحلام النجوم وقمرها...
بعض الكلام اللي تحليه مسموم...
وما كل كف صافحتك تغدرها...
كم طيب ساقته الأقدار لرخوم...
ويا كثر ناس تنخدع في صورها...
والحر مايشره على خنعة البوم...
الله رفع شانه ووطا قدرها...
لو جيتني كنك على الوجه ملطوم...
بعض الخطايا عذرها ماغفرها...
عندي تساوت هرجة العذر واللوم...
هذيك ما أبغاها وذيك أحتقرها...
زلة وعدت ماحدتني عن النوم...
مرت سلام وبعد الله كدرها...
أنا أعتبرها كبوة حصان ويقوم...
وأنت إعتبرها زي ماتعتبرها...

[السهم]

رشيدي ... كل الشكر لك على الابيات الجميله
تحياتي لك